ஐபிஎல் 2020 தொடர் மூலம் 2500 கோடி ரூபாய் விளம்பர வருமானம் ஈட்டிய ஸ்டார் நிறுவனம்!

உலகளவில் மிகப்பெரிய டி20 தொடர்களில் ஒன்று ஐபிஎல். இம்முறை கொரோனா ஊரடங்கால் உலகம் முழுவதும் விளையாட்டு போட்டிகள் தடை செய்யப் பட்டிருந்தன. இதனால் ஐபிஎல் தொடர் பெரும் எதிர் பார்ப்பை ஏற்படுத்தியது. இந்நிலையில் 2020ஆம் ஆண்டின் ஐபிஎல் தொடர் பெரும் வெற்றியை பெற்றது.

மேலும் தொலைக்காட்சி பார்வையாளர்கள் எண்ணிக்கை மற்றும் வருவாய் ஈட்டியது ஆகியவற்றிலும் இத்தொடர் பெரும் வெற்றியை பெற்றுள்ளது. இதுதொடர்பாக ‘இன்சைட்ஸ்போர்ட்ஸ்’ தளம் ஒரு ஆய்வை வெளியிட்டுள்ளது. அதன்படி 2020 ஐபிஎல் தொடரின் போது விளம்பரங்களின் மூலம் 2500 கோடி ரூபாயை ஸ்டார் நிறுவனம் வருவாய் ஈட்டியுள்ளதாக தெரியவந்துள்ளது.

இதில் ஸ்டார் ஸ்போர்ட்ஸ் செனலின் மூலம் 2250 கோடி ரூபாயும், டிஸ்னிபிளஸ் ஹாட்ஸ்டார் மூலம் 250 கோடி ரூபாயும் கிடைத்துள்ளதாக தெரியவந்துள்ளது. 2019ஆம் ஆண்டு ஐபிஎல் தொடரின் போது இந்த வருவாய் 2200 கோடி ரூபாயாக இருந்தது. தற்போது அது 250 கோடி ரூபாய் அதிகமாகியுள்ளது குறிப்பிடத்தக்கது.

அதேபோல 2020ஆம் ஆண்டு ஐபிஎல் தொடரின் தொலைக்காட்சி பார்வையாளர்கள் எண்ணிக்கையும் அதிகமாகியுள்ளது. இது 2019ஆம் ஆண்டு ஐபிஎல் தொடரைவிட 28 சதவிகிதம் அதிகமாக அமைந்துள்ளது. 2020 ஐபிஎல் தொடரின் முதல் 41 போட்டிகளை கிட்டதட்ட 7 பில்லியன் மக்கள் தொலைக்காட்சியில் பார்த்து ரசித்துள்ளனர்.

2019ஆம் ஆண்டு ஐபிஎல் தொடரின் 44 போட்டிகளை 5.5 பில்லியன் மக்கள் தொலைக்காட்சியில் பார்த்துள்ளனர். அத்துடன் சராசரியாக 2020 தொடரில் ஒவ்வொரு போட்டியையும் 108 மில்லியன் பேர் பார்த்து ரசித்துள்ளனர். இதுவும் 2019ஆம் ஆண்டு தொடரைவிட அதிகமாகும். 2019ஆம் ஆண்டு ஐபிஎல் தொடரின் ஒவ்வொரு போட்டியையும் சராசரியாக 98 மில்லியன் பேர் பார்த்து ரசித்து குறிப்பிடத்தக்கது.

மேலும் படிக்க: ஐபிஎல் 2020 தொடரின் டாப்-5 கேட்ச் என்னென்ன?