ஆஸி.ஓபன்: கலப்பு இரட்டையர் பிரிவு போட்டிகளில் பயஸ், போபன்னா முன்னேற்றம்!

ஆஸ்திரேலிய ஓபன் டென்னிஸ் தொடர் கலப்பு இரட்டையர் பிரிவு போட்டிகளில் இந்தியாவின்

ரோஹன் போபன்னா, லியாண்டர் பயஸ் ஆகியோர் அடுத்த கட்டத்துக்கு முன்னேறியுள்ளனர்.

இன்று நடைபெற்ற கலப்பு இரட்டையர் பிரிவு இரண்டாம் சுற்றில், இந்தியாவின் ரோஹன் போபன்னா - உக்ரேனியாவின் நதியா கிச்சனோக் இணை, அமெரிக்காவின் நிக்கோல் மெலிசர் - பிரேசிலின் ப்ரூனோ சோர்ஸ் இணையை தோற்கடித்தது.

போட்டியின் தொடக்கம் முதலே ஆதிக்கம் செலுத்திய போபன்னா - நதியா இணை 6-4, 7-6 என்ற நேர் செட் கணக்கில் போட்டியை வென்றனர். இரண்டாம் சுற்றை வென்றதன் மூலம் காலிறுதிக்கு முன்னேறியுள்ளது இந்த ஜோடி.

முதல் சுற்றில் உக்ரேனியாவின் லிட்மைலா - அமெரிக்காவின் ஆஸ்டின் கிராஜிசெக்கை 7-5, 4-6, 10-6 என்ற செட் கணக்கில் போபன்னா - நதியா ஜோடி வென்றிருந்தது.

அடுத்து நடக்க இருக்கும் காலிறுதி போட்டியில், போபன்னா - கிச்சனோக் ஜோடி, பார்பொரா - நிகோலா மெக்டிக் vs அமாண்டா - நொக் க்ரிகியோஸ் போட்டியின் வெற்றியாளரை எதிர்கொள்ள உள்ளது.

வெற்றியுடன் தொடங்கிய லியாண்டர் பயஸ்

2020-ம் ஆண்டுடன் டென்னிஸில் இருந்து ஓய்வு எடுக்க இருப்பதாக இந்தியாவின் பிரபல டென்னிஸ் வீரர் லியாண்டர் பயஸ் அறிவித்திருந்தார். இந்நிலையில், ஆஸ்திரேலியா ஓபன் கலப்பு இரட்டையர் பிரிவில் லத்வியாவின் ஜெலேனே ஒஸ்தாபென்கோவோடு ஜோடி சேர்ந்து விளையாடினார். இன்று நடைபெற்ற முதல் சுற்று போட்டியில், 6-7, 6-3, 10-6 என்ற செட் கணக்கில் ஆஸ்திரேலியாவின் ஸ்டார்ம் சாண்டர்ஸ் - மார்க் போல்மான்ஸை தோற்கடித்துள்ளனர்.

முதல் செட்டில் சோபிக்காத பயஸ் - ஜெலேனே இணை அடுத்த செட்டில் அதிரடியாக விளையாடியது.

90 நிமிடங்களுக்குள் முடிந்த இந்த போட்டியில் பயஸ் - ஜெலேனே ஜோடி சிறப்பாக

விளையாடியது.

இரண்டாவது சுற்றுக்கு முன்னேறியிருக்கும் இந்த ஜோடி, அமெரிக்காவின் பெதானி

மெட்டெக் சாண்ட்ஸ் - பிரிட்டனின் ஜாமி முர்ரேவை எதிர்கொள்ள உள்ளது.

இந்த ஆண்டு டென்னிஸில் இருந்து ஓய்வு பெற இருக்கும் பயஸ், சில டென்னிஸ் தொடர்களில் மட்டுமே பங்கேற்க இருக்கிறார். இந்நிலையில், ஆஸ்திரேலிய ஓபன் முதல் சுற்று வெற்றி பயஸுக்கு சிறப்பான தொடக்கத்தை அளித்துள்ளது.